البريوشة التي ترى كل شيئ

البريوشة التي ترى كل شيئ

العيش في ليبيا يحمل العديد و العديد من التحديات اللي اصلا العالم الثالث بحد ذاته تجاوزها من زمان، عدم وجود اي نوع من النظام في اي شيئ يخليك تقضي جميع | حوائجك | اليوميه بطريقه عشوائية و غير مجدية في كثير من الاحيان.

التحديات مثلا عدم وجود اي نظام عنونة و الشلل التام و المستفحل في خدمات البريد و المواصلات العامة يللي يخلي الناس تعتمد على التنقل بالسيارة لكل شئ ناهيك طبعا عن الارصفة اللي معبيه افخاخ و حفر اللي تخلي خيار المشي موضوع يحتاج تخطيط و ارادة قوية.

اني عندي ما اندير عادة في يومي نطلع نمشي مكانات نتم في حاجات عادة ما تكوم اتفه من الوقت و المجهود الضائع عليها ناهيك عن التوصيلات المتعددة الاغراض بس يبقى الكابوس الاكبر و الضخم يللي يواجه الناس يللي زيي اني مقضي يومه في السياره يدور من مكان لمكان هو الزحمة.

نظرية البريوشة التي ترى كل شبئ هي احد االنظريات التي من خلال التفحص و التمحص العميق الي قمت بيه للكائن الليبي خلال السنوات الماضية قدرت نطلع بيها و اني مقتنع تمام الاقتناع بيها زي المخلوقات الفضائيه و ان عقيله صالح وإي تي يقربوا لبعض، المهم ; النظرية تقول انه في منظمة سرية قاعدة في ليبيا منذ الازل من ايام الفراعنة و الالينز الاولين لما حطو في العجيلات تخدم في الاوردر متاع الهولي بريوشة.

لما جو المخلوقات اهما دارو مجحوعة من التجارب على الليبيين و عدلوا التسلسل الجيني متاعهم و طلعوا بحمض نووي ريبوزي ينتقل باللمس مهمته ان يخلي كل ليبي من غير وعي لما يشوف كوشه ينزل من سيارته يجري و هيا قاعدة تمشي السيارة باش يشد الطابور و ياخد خبزة بكميات عادة ما تكون فوق الحاجة، المنظمة الماسونية اهيا تملك جميع الكوش في ليبيا و توزع فيهم توزيع استراتيجي بما بخدم مصالحهم الغير معلنة، الأماكن اللي تفتح فيها الكوش هو السبب اللي أثار اهتمامي و قعدت نبحث في قانون الكوش الليبي و لقيت ان كلهم كلهم كلهم مخالفين و مفيش مرة كوشة تصطرت او غرَم صاحبها للسبب اهوا.

– هايبوتيسيس 1: الكوش وجدت لتثير الزحمة و تحسس الكائن الليبي بالفرستريشن الإحباط – دائما

كل واحد فينا من الاشخاص المناضلين السيمي عايشين داخل جدران ليبيا مر بنوبات انهيار عصبي اكتر من مرة و السبب كان كوشة، توصل الخدمة ما عندكش خلوق تخدم او تنبت في اول واحد تشوفه ناهيك عن الوقت الضائع من حياتك و الاشكال المقلبة رباعية الارجل ذات الانياب القهوية اللي تحاول تفتح معاك حوار خلال الزحمة باش تختم الحوار بجملة (لو تبي حاجة كلمني اني نخدم في معيتيقة او ابصر شنو مليشيا) كأنك بتهتم اصلا !! ينتهي بيك الامر توصل للمكان الي بتمشيله متأخر و الموظفين تبخروا مع ان الدوام مازال خمسة ساعات و يتم.

من الحالات المهه جدا في دراسة الكوش دائما في case  مثالية للدراسة، الكوشة اللي بداية شارع السيدي اللي تفتح عالجزيرة الحيوية و المهمة جدا في المجرة، ما نعرفش امتى فتحت بس احيانا نوقف امامها و لا يسعني الا اني نتأمل عظمة البقاحة اللي عند صاحبها و نقول واو و نتسائل كيف قدر يفتحها غادي ؟ اكيد هوا واصل داخل الأوردر اوف دا هولي بريوشة، و احتمال كبير يكون احد القياديين فيها.

حركة السير من عشرة طرق حيوية ستة منهم يجيبوا لجزيرة الدوران و اربعة يطلعوا منها تُشل تماما لما الكوشة توزع في الخبزة لان الكل لما يشوفها و يشم صنة البريوش ينقز من سيارته من غير وعي تماما.

مثال آخر هو الكوشة متاع شارع جرابة و مكانها وين !!!! بعد السيمافروا بالزبط يعني وجوده من عدمه لا يساوي شيئ، و مؤخرا اللي خلاني مقتنع ان المنظمة اهيا متقصدتني اني تحديدا هو لما فتحوا الكوشة اللي بجنب قهوة 66 قريب من جزيرة شارع المدار، اللي هيا طريق المرواح متاعي و دائما اول ما نخش منها نرتاح لان القادم اسهل و اسرع و ينقصوا الانتحاريين و الانتحاريات اللي تلقاهم في الطرق التانيه و الطريق تولي اوسع و غيره من اشياء اخرى و المفاجئة اللي فعلا جعلت عيناي تكتنز بالدموع هوا لما شفت الكوشة الي قريب تفتح في نهاية ميزران في مبني نادي الوحدة.

هايبوثيسيس 2 : الكوشة وجدت باش تخلي الكائن الليبي مدمن و تفقده عقله تدريجيا

عن تجربة شخصية عميقة جدا خلال طفولتي كنت تشامبيان متاع الخبزة في الحوش، يعني اني هوا من نتبع المخزون و الامدادات الحيوية داخل الحوش خصوصا فيما يخص الفطور، هوا اني نفيق بكري قبل الكل هذا تحدي عظيم ناهيك عن المشوار الي عالرجلين و هوا تحدي اعظم منه بس تلاحظ مع الوقت ان افراد العائلة يولي هاجس عندهم وجود الخبزة في الحوش و لو اخفقت انك تلبي احتياجهم اليومي منها ستواجه نظرات من الحقد عمرك ما شفتها قبل كأنك طعنتهم في مقتل او خنتهم خيانه عظمى، الموضوع كان غير منطقي في البداية بعدين غضيت النظر عنه الي ان وصلت لإكتشاف ان الموضوع في الجينات و ممكن اني نكون من الاشخاص يللي عندهم مناعة ضد الحمض النووي الريبوزي المعدل.

فانتوم كوشا

في بعض الاحيان النادرة جدا ان في كوشة تسكّر، ايه تسكّر !!!! اني نكتب و مصدوم قاعد زي الكوشة اللي في طريق قرجي بعد السفارة العراقية بس التأثير متاعها يبقى لاجيال و اجيال بعدها، الزحمة تستمر كما قبل و كأن الكوشه قاعدة مما يخليني نتأكد ان الحمض النووي الريبوزي المعدل يصنع بصمة وراثيه داخل التركيب الجيني عند الكائن الليبي لا يمكن مسحها تتناقل خلال الاجيال المتلاحقة، لو اي حد عنده الاعراض اهيا رح يلاحظ انه يوقف في اماكن غريبة و يحس برغبه جامحة انه ياكل فردة خبزة مع انه مافيش كوشه بحداه بس لو يدور في التاريخ رح يلقى انه في يوم ما كان في كوشة في المكان اللي وقف فيه

 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s